Алматыда жаңа кардиология бөлімі ашылды

АЛМАТЫ. ҚазАқпарат- Алматыдағы №4 қалалық клиникалық ауруханада 30 төсектік кардиология бөлімшесі ашылды, деп хабарлайды ҚазАқпарат тілшісі.

Аурухана баспасөз қызметінің мәліметінше, Түрксіб және Жетісу аудандары тұрғындары жүрек-қантамыр жүйесі патологиясы бар науқастар жақын жерден білікті, жоғары технологиялық кардиологиялық медициналық көмек ала алады.

«Бөлімшеде заманауи медициналық технологиялар – ЭКГ, ЭхоКГ, Холтер, АҚТМ, УДЗ, КТ, МРТ, рентгендік диагностика, эндоскопиялық зерттеулер және зертханалық диагностиканы қолдана отырып, науқастарды кеңейтілген тексеруге, диагнозды нақтылауға және дәлелді медицина принциптеріне негізделген адекватты терапия таңдауға барлық мүмкіндіктер бар»,- дейді бөлімше меңгерушісі Ризвангүл Якупова.

Кардиология бөлімшесінде мынандай қызметтер көрсетіледі:

- Жедел коронарлық синдром, тұрақсыз стенокардия, гипертониялық криз және т.б. коронарлық ангиографиямен стенттеу диагнозымен жедел науқастарды консервативті және кардио-интервенциялық емге ауруханаға жатқызу.

- Стент қою арқылы жоспарлы коронарлық ангиографияға жоспарланған науқастарды госпитализациялау.

- Кардиореабилитацияға жоспарланған науқастарды госпитализациялау.

Айта кетейік, №4 қалалық клиникалық ауруханада былтырдан бері халыққа кардиологиялық және интервенциялық кардиологиялық көмек көрсетіліп жатыр.

Халық арасында травматологиялық емхана ретінде танымал төртінші қалалық аурухана көрсетілетін қызмет түрлерін кеңейтуге бет бұрды.