Алматыда жаңа мектеп спорт алаңдары салынуда

АЛМАТЫ. ҚазАқпарат - Алматының барлық аумағында жаңа заманауи мектеп стадиондар мен ойын алаңдары ашылады. Бұл туралы өңірлік коммуникациялар қызметінде өткен брифингте қалалық білім басқармасының басшысы Ләззат Жылқыбаева айтты, деп хабарлайды ҚазАқпарат тілшісі.

Оның айтуынша, қазіргі уақытта 40-тан астам қалалық мектеп алаңы қайта жаңартылып жатыр. Спортпен шұғылдану, салауатты өмір салты – басқарма жұмысының негізгі бағыттарының бірі.

«Біз жоғары деңгейдегі спорттық бағыттағы қауіпсіз алаңдар жасағымыз келеді», - деді білім басқармасының басшысы.

Сонымен қатар, ол қазір Алматы қаласы білім басқармасы мемлекеттік-жекеменшік әріптестік жобасы аясында №10, 42, 63, 93, 94, 104, 128, 173, 181, 189 мектептердің 8 спорт алаңын және көпсалалы колледж жаңғыртылып жатқанын жеткізді.

«Инвестиция көлемі 400 млн теңгеден асады. Бұған дейін осы жоба аясында №40 және 95 мектептің аумағында спорт алаңдары жаңартылды», - деді Ләззат Жылқыбаева.

Спикердің сөзінше, жаңа спорт алаңдары мектеп оқушыларын қызықтыратын орынға айналады. Бүгінгі күні 33 мектеп пен №1 балалар үйінің спорт алаңдары жаңартылып жатыр. Оған жергілікті бюджеттен 1 млрд астам теңге қарастырылды.

«Биыл Алматы қаласы әкімдігінің мемлекеттік тапсырысымен қала мектептерінде оқушыларға арналған спорт секциялары ұйымдастырылады. Айта кетерлігі, жаттықтыру жұмысымен айналысатын дене шынықтыру мұғалімдерінің айлықтарына үстемақы қосылады»,- деді спикер.