Алматыда жаңа оқу жылында 1-сыныпқа қанша бала барады

АЛМАТЫ. ҚазАқпарат - Алматы қалалық білім басқармасының басшысы Ләззат Жылқыбаева онлайн брифинг барысында жаңа оқу жылында бірінші сыныпқа қанша бала баратынын айтты, деп хабарлайды ҚазАқпарат тілшісі.

«Алматы қаласында 287 жалпы білім беретін мектеп жұмыс істейді, оның ішінде 207 мемлекеттік және 80 жеке меншік. 2021-2022 оқу жылында 1-сыныптан 11-сыныпқа дейінгі оқушылардың алдын ала болжам бойынша контингенті 300 мыңға жуық бала. Бүгінгі күні бірінші сыныпқа 30 мыңға жуық бала қабылданды»,- деді басқарма басшысы.

Сонымен қатар, ол алғашқы қоңырау қалай өтетініне тоқталды.

«Білім күні мектеп аумағында ашық ауада сап түзеп, барлық мектептердің 1-сынып оқушыларына Әліппе/Букварь табыс етіледі (еріп жүрушілер саны шектеулі). 2-11 сынып оқушылары үшін бекітілген кабинеттерде сынып сағаты өтеді»,- деді ол.

Ләззат Жылқыбаева мектеп формасына қойылатын талап сақталатынын айтты. Білім мекемесіне классикалық стильдегі ыңғайлы киіммен келуге рұқсат етіледі.