Алматыда Жаңа жыл мерекесіне орай қандай мәдени шаралар өтеді
АЛМАТЫ. ҚазАқпарат - 25 желтоқсаннан қаңтар айының соңына дейін мегаполисте 60-тан астам түрлі іс шара өтеді.
Оның ішінде балаларға арналған ертеңгіліктер, театр қойлымдары, концерттер бар, деп хабарлайды ҚазАқпарат тілшісі.
Жаңа жылға арналған мәдени іс-шаралардың бағдарламасымен Алматы қалалық мәдениет басқармасының Instagram парақшасынан танысуға болады.
Алматы қаласының мәдениет басқармасы санитарлық- эпидемиологиялық жағдайдың шиеленісуіне және «омикрон» штамының таралу қаупіне байланысты сақтық шараларын сақтауды еске салады.
«Алматылықтарға вакцинацияны жалғастыру керек, ал бұрын егілгендер ревакцинациядан өту қажет. Вакцинация пунктері жұмысын жалғастырады»- делінген жазбада.
Айта кетейік, 20 желтоқсан күні Алматыда бас шыршаның шамдары жағылды.
Жаңа жылдың басты символының биіктігі – 20 метр. Бас шырша жарықдиод гирляндалармен, жаңажылдық ойыншықтармен безендірілген.
