Алматыда жаңа жылу маусымына дайындық жұмыстары жоспардан кешеуілдеп келе жатыр

АЛМАТЫ. 28 қыркүйек. ҚазАқпарат /Ерлік Ержанұлы/ -Жылу маусымына дайындық барысында коммуналдық шаруашылықтың тасымалдаушыларына жоғары талап қойылуда. Оны Алматы қалалық энергетика және коммуналдық шаруашылық басқармасының бастығы Серік Түтебаев бүгін депутаттық тыңдау кезінде айтты.

"Дайындықта үлкен мәселелер бар. Оған М-1 жылу магистраліндегі қайтақұру жұмыстары туралы келісімнің дер кезінде жасалмауы және құрал-жабдықтың шет елден кешігіп келуі түрткі болып отыр. Қазір жоспарды орындауға барлық күш-жігерімізді жұмсап жатырмыз. Жоспарлы жұмысты қуып жетіп, тұрғындарға жылуды өз уақытында беруді алдағы 15 күннің ішінде шешуге тырысамыз", - дейді Серік Сүйінбекұлы.

Оның айтуынша, жылу маусымының басында жоспарланған 100 Гкал. жоғары көздер құралдарының 73-інің 54-і, 100 Гкал. дейінгі көздердің 70-сінің 67-сі жөнделді. Жылу трассаларының 14 шақырымының 13-і, су құбырлары желісінің 24 шақырымының 19,2-сі және электр желілерінің 79,9 шақырымның 65,2-сі жөнделген. Жоспар 100 Гкал. жоғары көздерде 74 пайыз, 100 Гкал дейінгі көздерде 96 пайыз, жылу трассаларында 89 пайыз, су құбырлары желісінде 80 пайыз, электр желілерінде 82 пайызға орындалып отыр.