Алматыда жанар-жағармай бекетінің аумағына жүк вагондары аударылды
АЛМАТЫ. ҚазАқпарат - Алматыда Бөкейханов көшесімен өтетін теміржол желісінде екі жүк вагоны аударылды, деп хабарлайды ҚазАқпарат тілшісі.
Нақтырақ айтқанда, төтенше оқиға аталмыш теміржол желісінің Райымбек көшесі мен Рысқұлов көшелері аралығында болды.
Жүк вагондары аударылып, «Гелиос» жанар-жағармай бекетінің жерасты цистерналарының үстіне құлаған. Жанар-жағармай бекетіне зақым келмегенімен, қауіпсіздік мақсатында қазір аталған көше толығымен жабылып, өрт сөндіру қызметі шақыртылған.
Теміржол құрамының аударылу себебі анықталу үстінде.
