Алматыда жантүршігерлік жол апатынан үш адам мерт болды
АЛМАТЫ. ҚазАқпарат - Алматыдағы Саин көшесінде жол апаты болып, салдарынан үш адам қайтыс болды, деп хабарлайды ҚазАқпарат тілшісі.
Алматы қалалық Полиция департаментінің мәліметінше, жол апаты 26 қаңтар түнгі сағат 23:30 шамасында Әуезов ауданында болды.
«Хонда» маркалы автокөлігінің жүргізушісі - 2003 жылы туған Р. есімді азамат, Саин көшесімен солтүстік бағытта келе жатып, рульді басқара алмай, жарықтандыру шамы бағанасына соғылды. Жол-көлік оқиғасы салдарынан жүргізуші мен оның екі жолаушысы – 2003 жылы туған И. есімді азамат және 2004 жылғы Н. есімді азамат мерт болды», - деп хабарлады Алматы қалалық ПД баспасөз қызметі.
Аталған дерек ҚР ҚК-нің 345-бабы 4-бөлігі бойынша сотқа дейінгі тергеудің бірыңғай тізіліміне тіркелді.
Сараптамалар тағайындалды.
