Алматыда жапон мәдениетінің фестивалі өтті (ФОТО)
АЛМАТЫ. ҚазАқпарат- Бүгін Алматыда ҚР Орталық мемлекеттік музейінде Жапония елінің мәдениеті фестивалі өтті. Онда алматылықтар күншығыс елінің өнері және салт-дәстүрлерімен жақын танысты.
Осы орайда музей қабырғасында дәстүрлі түрде жапон елінің маңызды тарихи кезеңдері, киім үлгісі, қолөнер бұйымдары жайында жекелеген көрмелер ұйымдастырылды.
«Жапония мәдениетінің фестивалі Қазақстанда осымен 10-шы рет өткізіліп отыр. Ол дәстүрлі түрде осы наурыз айында ұйымдастырылады. Шараның басты мақсаты - қала тұрғындары мен қонақтарын күншығыс елінің мәдениеті, салт-дәстүрі және әдет-ғұрыптарымен жақын таныстыру», - деді Қазақстан-Жапония орталығының директоры Жанар Оразғалиева.
Фестивальге келушілер алдымен жапон дабылшыларының тайко деп аталатын ұлттық аспаптағы өнерін, сондай-ақ, кэндо - семсерлесу шеберлерінің өнерін тамашалады.
«Фестиваль аясында осы музейде сәндік-қолданбалы өнер, оригами, маталарды бояуға және өрнектеуге арналған қағаз трафарет, иероглиф жазу, жапондардың ұлттық тағамдарын және шай әзірлеу рәсімі бойыншга шеберлік сыныптары болады», - деді Ж. Оразғалиева.
Айта кетелік, аталмыш іс-шара Жапонияның Қазақстандағы елшілігінің қолдауымен өткізілді. 
