Алматыда ЖҚТБ індетіне қарсы күрес айлығы өтеді
АЛМАТЫ. Қарашаның 11-і. ҚазАқпарат /Әділет Мұсахаев/ - Алматыда ЖҚТБ орталығы «Көпшіліктің қолжетімділігі және адам құқығы» тақырыбында өткізілетін дүниежүзілік ЖҚТБ-мен күрес науқаны аясында айлық өткізеді.
Ол туралы ұйымдастырушылар бүгін болған баспасөз мәслихатында мәлім етті, деп хабарлайды ҚазАқпарат.
Аталмыш шара қарашаның 10-ы мен желтоқсанның 10-ы аралығында өтеді.
«Осы айлықтың мақсаты - қоғамның осы індетке қарсы күреске назарын аудартып, ақпараттық жұмыстар жүргізе отырып, жастар мен жасөспірімдер арасында орнықты мінез-құлық қалыптастыру. Сонымен қатар, әртүрлі іс-шаралар ұйымдастырмақпыз. Орта және жоғары оқу орындарында спорттық ойындар, ең үздік театрландырылған көріністер, КТК және дөңгелек үстелдер өткізіледі. Қаланың өнеркәсіп орындары мен сауда-саттық орталықтарында радиодәрістер оқылып, әртүрлі үнпарақтар, қорғану заттары таратылады», дейді Алматы ЖҚТБ орталығының эпидемиолог-дәрігері Айнұр Жандыбаева.
