Алматыда жоғары технологиялар арқылы 275 миллион теңге ұрлаған бойжеткен мен бозбала ұсталды
АСТАНА. Маусымның 9-ы. ҚазАқпарат /Айдар Оспаналиев/ -Алматыда 24 жасар бойжеткен мен 26 жасар азамат жауапкершілігі шектеулі серіктестіктердің бірінің ақша аударуға арналған электронды, сандық қолтаңбасының файлын ұрлап, өздерінің есептеріне 275 миллион теңге аударып алған,
деп хабарлайды ҚазАқпарат.
Ішкі істер министрлігінің мәліметтеріне қарағанда, ағымдағы жылдың сәуір айында жауапкершілігі шектеулі серіктестікке клиент ретінде келген қыз қағаздарының көшірмесін жасап алайын деген желеумен флеш-картаның көмегімен серіктестіктің компьютеріне вирус енгізіп кеткен. Бұдан соң олар вирусы бар компьютердің әлсіздігін пайдалана отырып, серіктестіктің компьютердегі қызмет желісіне кіріп, өздерінің жымысқы әрекеттерін жүзеге асырған. Қазіргі таңда осы әрекет бойынша қылмыстық іс қозғалды.
