Алматыда жол апатынан 2 жасар бала зардап шекті
АЛМАТЫ. ҚазАқпарат - Алматыда жол апатынан 2 жасар бала жарақат алды. Жол апаты «Айнабұлақ-2» шағын ауданында болған.
Ауладан шыққан Субару Форестер Палладин көшесімен келе жатқан Лексус көлігін қағып кетті. Лексус қарама-қарсы келе жатқан жүк көлігіне барып соғылады.
Жүк көлігі әйнек пен гипсокартон тасымалдап келе жатқан.
Жол апатынан жүк көлігі мен Лексус жүргізушілері, Форестердегі 2 жасар бала жапа шекті. Бала арнайы автокреслода отырған.
Оқиға орнына жеткен жедел жәрдем үшеуін де ауруханаға алып кетті.
