Алматыда «Жол қозғалыс қауіпсіздігі апталығы» басталды
Бұл операция қала жолдарында қоғамдық және жол қозғалысы қауіпсіздігін қамтамасыз ету мен жол қозғалысы ережесін өрескел бұзушыларды анықтауға бағытталған.
"Ағымдағы жылы соңғы 7 айдың қорытындысы бойынша қалада жол-көлік оқиғалары мен авариялық жағдай санының едәуір азайғандығы байқалады. Жыл басынан осы уақытқа дейін 1 226 жол-көлік оқиғасы тіркелді, бұл көрсеткіш 2009 жылға қарағанда -1.0 пайызға төмен (1239). Әр түрлі дене жарақатын алғандардың саны биыл -2 пайызға төмендеп отыр. 2009 жылы 1 355 болса, биыл 1 333 адам жарақат алды", деді Алматы қаласының ІІД-нің жол полиция Басқармасының бастығы, полиция полковнигі Арман Сарбасов. Оның айтуынша арнайы қабылданған шаралардың арқасында қала жолдарындағы жол-көлік жағдайлары тұрақтанған.
Ол сонымен қатар, жаңа оқу жылы алдында "Назар аударыңыздар, балалар!" атты алдын-алу шарасына дайындықтар жүргізіліп жатқандығын хабарлады. "Бұл шара тамыз айының 31-нен қыркүйек айының 9-на дейін өтеді. Шара барысында әр мектептің жанынан (181 мектепке) жол полиция қызметкері бекітілетін болады. Олар балалар қауіпсіздігін қамтамасыз ету мақсатында оқушылармен жол жүру ережесін сақтау бойынша алдын-алу жұмыстарын жүргізеді", деді Арман Сарбасов.
Анықтама үшін: Жыл басынан бері балалардың қатысуымен 165 жол-көлік оқиғасы тіркелген. Биыл оның саны 2009 жылға қарағанда 2 пайызға төмендеген. 2009 жылы 174 бала әр түрлі жарақат алса, биыл 168 бала дене жарақатын алған. Бұл көрсеткіш 2009 жылға қарағанда -3 пайызға төмен.