Алматыда жолаушылардың 30%-ы жолақы төлемеуге тырысады
АЛМАТЫ. ҚазАқпарат - Алматыда қоғамдық көлік жолаушыларының 30%-ы жол ақысын төлемейді. Бұл туралы бүгін Алматыда өткен баспасөз мәслихаты барысында «Алматыэлектротранс» ЖШС директоры Ғани Тәжиев айтты, деп хабарлайды ҚазАқпарат тілшісі.
«Қай жағдайда болмасын жол ақысын төлеген дұрыс. Біздің зерттеулерімізге сәйкес, жолаушылардың 30%-ы жол ақысын төлемейді. Автобустар толы болған кезде транзакциялар санына қарап орташа статистика шығарамыз. Бізде бақылау-ревизия қызметімен келісімшарт бар. Олар бізге апта сайын есеп беріп тұрады. Байқағанымыздай, жолаушылар көбінесе жұмысқа барарда әрі қайтарда жол ақысын төлемейді», - деді Ғани Тәжиев.
Айта кету керек, Алматыда жолаушыларды тасымалдаумен 14 автопарк айналысады. Олардың 1-еуі ғана коммуналдық меншікте болса, 13-і жекеменшік. Қоғамдық көліктер 122 маршрут бойынша тасымалдайды.
