Алматыда жүргізуші куәлігінсіз автокөлік айдаған азамат 10 тәулікке қамалды
АЛМАТЫ. ҚазАқпарат – Алматы қалалық прокуратурасы мен қалалық полиция департаменті бірлескен рейдтің барысында жүргізуші куәлігінсіз автокөлік жүргізген азаматты анықтады, деп хабарлайды ҚазАқпарат тілшісі.
Қалалық прокуратураның баспасөз қызметінен хабарлағандай, 3 желтоқсан күні полиция экипажы Б. есімді азамат жүргізген «Мерседес» маркілі автокөлікті тоқтатады. Тексеріс барысында оның биыл 10 қарашада жүргізуші куәлігінен 6 айға айырылғаны анықталды.
«Сол күні Алматы қаласының әкімшілік құқық бұзушылықтар жөніндегі мамандандырылған ауданаралық соты оны ҚР ӘҚБтК-нің 612-бабының 3-бөлігі бойынша 10 тәулікке әкімшілік қамауға алды», - деп хабарлады прокуратурада.
Осыған орай Алматы қалалық прокуратурасы автокөлік жүргізушілерді жол қозғалысы ережелерін сақтап, басқа көлік жүргізушілерге қауіп төндірмеуге шақырды.
