Алматыда жыл сайын кемінде 35 ірі бұқаралық іс-шара өтетін болады - Ерболат Досаев
АЛМАТЫ. ҚазАқпарат - Алматыда 2030 жылға дейін кемінде 16 дене шынықтыру-сауықтыру кешені салынады. Бұл туралы қала әкімі Ерболат Досаев мәлімдеді, деп хабарлайды ҚазАқпарат тілшісі.
Алматы әкімінің айтуынша, қаладағы орталық стадионға халықаралық стандарттарға сәйкес жаңғырту жұмыстары жүргізіліп, жаңа жеңіл атлетика манежі ірге қалайды.
«Жыл сайын көптеген қалалық спорттық іс-шаралармен қатар, халықаралық деңгейде кемінде 35 ірі бұқаралық іс-шара өткізетін боламыз. Бұл алматылықтардың дене шынықтыру және спортпен қамтылуын 2025 жылға қарай 40%, 2030 жылға қарай 50%-ға дейін ұлғайтуға мүмкіндік береді», - деді Ерболат Досаев.
Ол сондай-ақ Алматыда стрит-спортты дамыту (жүгіру жолдары мен спорттық алаңдар) қолға алынатынын және ресми дерек бойынша, бүгінде алматылықтардың тек үштен бірі ғана үнемі дене шынықтыру және спортпен айналысатынын атап өтті.
