Алматыдағы сегіз мореналық көл биыл үлкен қауіп төндіреді
АЛМАТЫ. ҚазАқпарат – Алматы қаласының маңында 45 мореналық және мұздық көлдер орналасқан, олардың ішінде аса қауіптісі – 12, ал биылғы жылы 8 көл ең қауіптісі болып отыр. Бұл туралы Алматы қаласы Төтенше жағдайлар департаментінің Instagram парақшасында айтылды.
Ағымдағы жылы Ақсай, Үлкен және Кіші Алматы өзендерінің бассейндеріндегі 8 көлді босату бойынша алдын алу жұмыстары жоспарланған.
«8 көлде 90 адам жұмысқа кіріседі, бульдозерлер іске қосылады, эвакуациялық каналдар тереңдетіледі және тазартылады, сифон құбырларын монтаждау, сондай-ақ сорғы қондырғыларын іске қосу жұмыстары жүргізіледі. Өнімділігі жоғары 9 сорғы, 2000 метр полиэтилен құбырлары дайындалды, олар 2019 жылы Алматы әкімдігінің қолдауымен сатып алынды», – делінген департамент хабарламасында.
Сел қаупі бар кезеңде мореналық көлдерді бақылау үшін 21 бекет жұмыс істейтін болады. 2020 жылы 7 мореналық көлден тазарту және тереңдету жолымен ағызу каналдары арқылы, сондай-ақ сифон құбырларынан 5,2 млн м3 су тартып шығарылды.
