Алматыдағы «Тұран» лицейінде «Сәлем, Ақ Азиада!» атты спорттық шара өтті
АЛМАТЫ. 24 қаңтар. ҚазАқпарат /Әділет Мұсахаев/ - Бүгін Алматыдағы «Тұран» лицейінде Бостандық ауданы әкімі аппаратының ұйымдастыруымен мектеп оқушыларының арасында «Сәлем, Ақ Азиада!» атты спорттық іс-шара өтті.
Іс-шараны аталған аудан әкімінің орынбасары Саят Ағыбаев кіріспе сөзбен ашып, жастарға алда болатын Азиада ойындарының ел тарихындағы маңыздылығы жайында баяндап, спорт мәдениетін қалыптастыруды күн тәртібіне қойуды тапсырды.
«Шараның мақсаты - 7-Қысқы Азия ойындарын кеңінен насихаттау, жастарды салауатты өмір салтына баулу», - дейді С. Ағыбаев.
Аталмыш шара барысында көкөністерді жинау, екі допты кенгуру, үлкен доппен секіру сынды қызықты спорттық эстафеталар ұйымдастырылды, соңынан ойын жеңімпаздары марапатталып, оларға мақтау қағаздар мен түрлі кәдесыйлар табысталды.
