Алматылық 9 компания «Қазақстанның үздік тауары» республикалық көрмесіне қатысады
АЛМАТЫ. ҚазАқпарат - Алматыда «Қазақстанның үздік тауары» қалалық көрмесі ашылды, деп хабарлайды ҚазАқпарат тілшісі.
Келушілер назарына жеңіл өнеркәсіп, тағам және жиһаз, көлік құралдарын шығаратын кәсіпорындардың өнімдері қойылды. 
«Өндірістік мақсаттағы үздік тауарлар», «Халыққа арналған үздік тауарлар», «Үздік азық-түлік тауарлары» аталымдары бойынша 9 жеңімпаз республикалық көрмеде бағын сынайтын болады. 
«Қатысушы компанияларға қойылатын талаптар да белгілі. Экспорт көрсеткіші болу керек. Тауарларға арыз-шағымдар жоқ болуы шарт. Сондай-ақ, өндірушілерде ноу-хау, жаңалықтар, патенттер болса құба құп», - деді қалалық кәсіпкерлер палатасының сарапшысы Любовь Алексеева.
Айта кету керек, көрме-байқаудың финалдық жеңімпазын Мемлекет басшысы Нұрсұлтан Назарбаев марапаттайды.
