Алматылық медицина ұйымдарында аудит жүргізілді
АЛМАТЫ. ҚазАқпарат – Алматыда 888,4 мың тұрғын міндетті әлеуметтік медициналық сақтандыру пакетіне кіретін қызметтерді тегін пайдалана алады. Бұл туралы медициналық сақтандыру мәселелері жөніндегі республикалық штаб отырысында «Әлеуметтік медициналық сақтандыру қоры» КЕАҚ Алматы филиалы директоры Нұрлыбек Қабдықапаров айтты, деп хабарлайды ҚазАқпарат тілшісі.
«Биылдан бастап жеңілдігі бар 15 санатқа жататын тұрғындарға сақтандыру пакетіндегі қызметтер мемлекет есебінен көрсетіледі. Қазіргі таңда шамамен Алматы тұрғындарының 44,7% аталған санатқа кіреді», - деді Нұрлыбек Қабдықапаров.
Филиал басшысы алматылықтарды медициналық сақтандыру жүйесімен толыққанды қамту, барлық медицина ұйымдарындағы ақпараттық жүйелерді ықпалдастыру, әрбір тұрғынның мәртебесін анықтау мәселелерінің маңызын атап өтті. Айтуынша, 2018 жылдың 1 қаңтарында қала бойынша мәртебесі анықталмаған 246 мың адам болған. Өткен жылдың соңында 197 мың адамның сақтандыру жүйесіндегі мәртебесі анықталды.
2020 жылға белгіленген жоспар бойынша, 159,2 млрд теңгенің қызметі сатып алынбақ. Оның 103,5 млрд теңгесі – тегін көмек пакетіне, 55,7 млрд теңгесі – МӘМС пакетіне тиесілі.
«Биыл КТ/МРТ қызметтеріне 3,8 млрд теңге, онкологиялық сырқаттарды емдеуге 49 млн теңге қарастырылған. Жалпы қала бойынша 12 КТ, 13 МРТ аппараты бар», – деді ол.
Денсаулық сақтау вице-министрі Ләззат Ақтаева Алматы қаласының МӘМС-ке дайындық деңгейі жоғары екенін атап өтті.
«Бүгінгі таңда медицина мекемелеріндегі жұмыс орындары компьютермен толық қамтамасыз етілген. Мемлекеттік емханалар мен ауруханалар ақпараттық жүйелерге қосылған. Сондай-ақ, МӘМС щеңберінде қалпына келтіру, оңалту, консультативтік-диагностикалық көмек пен стационарды алмастыратын көмекке бөлінетін қаражат та едәуір артып отыр», - деді вице-министр.
Алдын ала берілген мәліметке сүйенсек, 2020 жылы халыққа 269 медицина ұйымы қызмет көрсетеді. Оның 131-і — тегін медициналық көмек пакеті, 138-і — сақтандыру пакеті бойынша жұмыс істейді. Қормен келісімшарт бекіткен клиникалардың басым бөлігі - жеке меншік.
