Алматылық мұғалімдер халықаралық тағылымдамадан өтті
АЛМАТЫ. ҚазАқпарат- Алматылық педагогтар кадрлық әлеуетті дамыту бағдарламасы аясында алғаш рет халықаралық тағылымдамадан өтті, деп хабарлайды ҚазАқпарат тілшісі.
Әкімдік таратқан мәліметке сәйкес, Алматының 50 мектебінің басқару командалары «Басқару және көшбасшылық: таяуда даму мектебі» кәсіби қайта даярлау бағдарламасының халықаралық дипломын алды.
50 білім беру ұйымының 150 басшысын оқыту 2022 жылдың мамыр-желтоқсан айлары аралығында қалалық әкімдіктің бастамасымен қаланың кадрлық әлеуетін дамыту жөніндегі «Алматы мектебі» бағдарламасы аясында жүзеге асты.
10 ай ішінде басқарушы командалар менеджмент, көшбасшылық, экономика және қаржы, өзгерістерді басқару, цифрлық білім беру, білім бағдарламаларын жобалау және білім беру саясатының трендтері саласында құзыреттерді қалыптастыруға бағытталған жеті күндізгі оқыту модулінен өтті.
Бағдарламада оқытудың әртүрлі форматтары қолданылды, олар: интерактивті презентациялар, топтық жұмыстар, тьюторлық сүйемелдеу, қатысушылардың кейстерін көрсету және шақырылған спикерлердің дәрістері.
Оқыту барысында басқарушы командалар өз ұйымдарын дамыту бағдарламаларын және оларды енгізу жөніндегі даму жобаларын әзірледі.
Мектептерді дамытудың үш жылдық бағдарламаларын Алматы қаласының білім басқармасы және білім берудегі жаңа технологиялардың қалалық ғылыми-әдістемелік орталығының сарапшыларының алдында қорғады.
Қайта даярлау бағдарламасының авторлары мен тәлімгерлері - Финляндия, Германия, Эстония, Ресей мен Қазақстанда кеңінен танылған практиктер.
Оның барысында қатысушыларға сарапшылар тьюторлық қолдау көрсетті, жаңа құзыреттер бойынша модульаралық онлайн курс оқытылды және алғаш рет халықаралық тағылымдамадан өту мүмкін болды.
Өткен жылдың 2-8 қараша аралығында Финляндия мен Эстонияда Алматы мектептерінің 50 директоры тағылымдамадан өтті.
Педагогтар ашық сабақтарға қатысып, инновациялық мектептер, университет және Хельсинки балабақшалары мысалында фин жүйесінің феноменіне үңілді.
