Алматылық волейболшы жігіттер клубтық Азия чемпионатында 5-орын алды

АЛМАТЫ. 30 сәуір. ҚазАқпарат - Волейболдан 21-29 сәуір күндері Иранның Тегеран қаласында ерлер командалары арасындағы XIV Азия чемпионаты өтті.

13 елдің чемпиондары қатысқан бұл жарыста Геннадий Паршин жаттықтыратын «алматылықтар» үздік бестіктің қатарынан көрінді. Топтық сында қарсылас шақ келтірмеген оларды 1/8 финалда сүріндірген катарлықтар («Al-Rayyan») күміс жүлдегер атанды. Ал ширек финалда жүлделі орынға таласу мүмкіндігінен айырған қытайлықтар («Liaoning») 4-орынды иеленді.

Бұл жолы бірде-бір ойында жеңіліс таппаған ирандықтар («Kalleh») чемпиондық атақты иеленіп, өз елінің мәртебесін тоғызыншы рет әлемге паш етті.Үздік үштікті тайбэйдің«Taiwan Power» командасы түйіндеді.