Алматының Алатау ауданында автобустың жаңа бағыттары ашылды

АЛМАТЫ. ҚазАқпарат – Алматыда Алатау ауданы тұрғындарының өтініштері негізінде 6 маршруттық желі жаңартылып, кеңейтілді. Бұл туралы қала әкімі Ерболат Досаев мәлімдеді, деп хабарлайды ҚазАқпарат тілшісі.

«№129 және №132 маршруттардың бағыттары ұзартылды және автобустардың саны артты. «Қарасу» және «Мәдениет» шағын аудандарына баратын жаңа маршруттар іске қосылды. Олар №35 автобус «Қарасуға», №24 автобус «Мәдениетке» барады. Шағын аудандағы №103 бағытындағы автобустар жаңартылды. «Шаңырақ-1» шағын ауданына баратын №103-ші және «Дархан» шағын ауданына баратын №69-шы автобустар жаңартылды», - деді Ерболат Досаев.

Ол, сондай-ақ, тамыз айының соңына дейін «Жылу энергетик» бағбандық қоғамы тұрғындарының өтініші бойынша ұзындығы 18 шақырым болатын №142 жаңа маршрут іске қосылатынын айтты.

«Сондай-ақ, тұрғындардың өтініші бойынша 20 аялдаманың құрылысы жүріп жатыр. Жыл соңына дейін 50 аялдама салынады. Осылайша Алатау ауданында автобус аялдамаларының жетіспеушілігі мәселесі толығымен шешіледі»,- деді қала әкімі.