Алматының дизайн-код жобасы келесі жылы қабылданады

АЛМАТЫ. ҚазАқпарат – 2021 жылы Алматы қаласының дизайн-код жобасы қабылданады. Бұл туралы онлайн брифинг барысында қалалық Жоспарлау және урбанистика басқармасының басшысы Алмасхан Ахмеджанов мәлім етті, деп хабарлайды ҚазАқпарат тілшісі.

Оның айтуынша, қазір қаланың барлық субъектілерінен дизайн-код бойынша ұсыныстар мен ескертпелер жинақталуда.

«Дизайн-код бойынша жүргізіліп жатқан жұмыстарды жыл соңына дейін аяқтаймыз деп ойлаймын. Келесі жылдан бастап дизайн-код жобасын ресми түрде қабылдаймыз. Бұл – Алматыдағы архитектуралық шешімдерді дамытуды қамтамасыз етеді. Кәсіпкерлер үшін де, қалалықтар үшін де – бірыңғай стандартты құжат», - деді Алмасхан Ахмеджанов.

Дизайн-код – қаланы, қала көшелерін, қоғамдық аймақтарды безендірудің бірыңғай сәулеттік стилі. Жобаның мақсаты – ғимарат қасбеттерінің элементтеріне қойылатын бірыңғай талапты әзірлеу: кіреберіс, маңдайшалар, ақпараттық тақталар, балкон қоршаулары, ауабаптағыш және т.б.