Алматының мамандандырылған ХҚО-ларында кезек болмас үшін қосымша 48 терезе ашылды
АЛМАТЫ. ҚазАқпарат – Алматының мамандандырылған ХҚО-ларында автокөлік иелерінен кезек пайда болды. «Азаматтарға арналған үкімет» мемлекеттік корпорациясы Алматы қалалық филиалының баспасөз қызметі қабылданып жатқан шаралар туралы мәлімдеді, деп хабарлайды ҚазАқпарат тілшісі.
Кезекті азайту мақсатында шетелдік көліктерді заңдастыруға өтініш қабылдау үшін қосымша 48 терезе ашылған.
«Басқа бөлімдердің қызметкерлері тартылды, күшейтілген жұмыс режимі енгізілді. Мәселен, №1 мамандандырылған ХҚО-дағы шетелдік көліктерді заңдастыру бойынша құжат қабылдап отырған 10 қызметкер 42 адамға ұлғайтылды. №2 МХҚО 8 терезе орнына 16 терезе жұмыс істеп тұр. №5 МХҚО-да 10-нан 12 терезеге және №6 МХҚО-да 9-дан 15 терезеге ұлғайтылды», - деп хабарлады «Азаматтарға арналған үкімет» мемлекеттік корпорациясы Алматы филиалының баспасөз қызметі.
Сондай-ақ, баспасөз қызметі көлікті заңдастыру үшін eGov.kz порталы және екінші деңгейлі банктердің мобильдік қосымшалары арқылы берілген өтінімдер 1 шілдеден кейін де уәкілетті органда қаралатындығын еске салды.
«Автокөлік иелеріне айтар кеңесіміз, мамандандырылған ХҚО-ға келіп уақытыңызды кетірмей, үйде отырып онлайн өтініш беріп, мақұлдау алған соң ғана мамандандырылған ХҚО-ға келіңіз», - деп ескертті «Азаматтарға арналған үкімет» мемлекеттік корпорациясының Алматы қалалық филиалынан.
Еске салайық, өткен айда да Алматыдағы автоХҚО-ларда ұзын-сонар кезек пайда болған еді.
Бұған дейін хабарланғанындай, шетелдік автокөліктерді заңдастыру мерзімінің аяқталуына аз уақыт қалуына байланысты мамандандырылған ХҚО-лар күшейтілген жұмыс режиміне көшті.
