Алматының Наурызбай ауданында екі емхана мен дәрігерлік амбулатория салынады
АЛМАТЫ. ҚазАқпарат - Медициналық мекемелердің жетіспеушілігі мен емханалардың шамадан тыс жүктелуі - Алматының Наурызбай ауданындағы негізгі мәселелердің бірі. Бұл туралы Наурызбай ауданының тұрғындарымен кездесу барысында қала әкімі Ерболат Досаев айтты, деп хабарлайды ҚазАқпарат тілшісі.
«Ауданның жоғарғы бөлігінде емдеу мекемелері жоқ. Сондай-ақ, инфрақұрылымды дамытудың жылдам қарқынын және аудан халқының жыл сайынғы 10-12 мыңға өсуін ескере отырып, Алматы қаласының әкімдігі 500 келушіге арналған 2 жаңа емхана мен 200 келушіге арналған дәрігерлік амбулатория салуды жоспарлап отыр», – Ерболат Досаев.
Қала әкімі атап өткендей, «Ақжар» ықшам ауданында 200 орындық дәрігерлік амбулатория құрылысына жобалық-сметалық құжат әзірлену үстінде. Құрылыс жұмыстары 2023 жылдың 1-тоқсанында басталады.
«Құрамыс» ықшам ауданында емхананың жобалық-сметалық құжаты әзірленді. Құрылыс 2023 жылдың 2-тоқсанында басталады.
Ал «Шұғыла» ықшам ауданы бойынша емхананың жобалық-сметалық құжатын әзірлеуге конкурс жарияланады. Құрылыстың басталуы 2024 жылдың 1-тоқсанына жоспарланды.
