Алматының Наурызбай ауданында жаңа оқу жылында екі мектеп ашылады

АЛМАТЫ. ҚазАқпарат - Мектептегі орын тапшылығын азайту үшін 1 қыркүйекке қарай ауданда 2400 орындық 2 мектеп ашылады. Бұл - Қалқаман шағын ауданында 1800 балаға арналған №206 мектеп пен Қарғалы шағын ауданындағы 600 орындық «Заман» жекеменшік мектебі. Бұл туралы қала басшысы аудан тұрғындарымен кездесуде айтты, деп хабарлайды ҚазАқпарат тілшісі.

Ерболат Досаевтың айтуынша, жыл соңына дейін тағы 2 мектептің құрылысы аяқталады. Бұл - «Алма сити-5» тұрын үй кешені аумағындағы 1200 орындық және «Қалқаман» шағын ауданындағы Абай даңғылында орналасқан 1500 орындық мектеп.

Бұған қоса, Шұғыла шағын ауданы аумағындағы «Әлем сити» ТК, «Алма сити-4» ТК тұрғын үйді салушылар 1200 орындық 2 мектептің құрылысын қолға алған. Бұл 2023 жылдың 3-тоқсанында аяқталады.

«Құрамыс» шағын ауданында 1200 орындық және «Шұғыла» шағын ауданында 1600 орындық мектептің құрылысы келесі жылға жоспарланып отыр. «Шұғыла» шағын аудандағы №174 мектепке жапсарлас 375 орындық құрылыс жүргізудің ЖСҚ әзірленуде. Бұл келер жылдың 2-ші тоқсанында басталады. Мектепке дейінгі орын тапшылығын азайту үшін биыл «Шұғыла» шағын ауданында 320 орындық балабақшаның құрылысы басталды. Аяқталу мерзімі – 2023 жылғы 2-тоқсан»,-дейді қала әкімі.

«Нұрлы Дала» тұрғын үй кешеніде 320 орындық балабақшаның жобалық-сметалық құжаттама әзірленді. Жақында 800 орындық 3 балабақшаның ЖСҚ дайындауға байқау жарияланады. Құрылыс 2023 жылы басталады.