«Алтын қалам» әдеби байқауы жаңа науқанын жариялады

АСТАНА. KAZINFORM – Биыл құрылғанына 15 жыл толып отырған «Алтын қалам» байқауы осы датаға орай үш жылдық үзілістен кейін жаңа маусымын жариялады.

Байқауға қазақ тілінде жазылған жұмыстар қыркүйектің 5-нен бастап, қарашаның 20-не дейін қабылданады. Оқырмандар қараша айының 20-на дейін дауыс бере алады.

Әдеби туындыларды ұйымдастыру комитетінің [email protected] электрондық поштасына жолдауға болады.

Конкурс жайлы толық мәліметті жүлденің www.aqalam.kz ресми сайтынан біле аласыздар. Сайысқа түскен барлық шығарма аталған сайтта орналастырылады. Байқау барысында мынадай аталымдар бойынша дауыс беріледі:

1. Жылдың үздік балалар шығармасы

2. Жылдың үздік поэзиясы

3. Жылдың үздік прозасы

4. Жылдың үздік сатирасы

5. Жылдың үздік фантастика және детектив шығармасы

6. Жылдың үздік киносценарийі және драматургиясы

Алғашқы кезеңде шығармалар www.aqalam.kz веб-сайтында іріктеледі. Оқырмандар өзіне ұнаған жұмысқа дауыс бере алады.

www.aqalam.kz сайтындағы онлайын-дауыс беру 3 ай бойы өтеді. Дауыс беру аяқталған соң әр аталым бойынша 6 шығарма таңдап алынады. Сайыстың екінші кезеңіне оқырмандар тарапынан ең көп ұпай жинаған шығармалар және қазылар назарына ілінген туындылар өтеді. Ақтық іріктеу сатысында қазылар әрбір номинация бойынша жеңімпаздарды жасырын дауыс беру арқылы анықтайды. Айта кетерлігі сайыс барысында шығарма авторлары көрсетілмейді.

Айта кететін жайт, қазылар құрамында қаламгерлер, әдебиетшілермен қатар өзге саланың кәсіби мамандары да бар. Көптің талқысына ұсынылған әдеби шығармалардың авторы көрсетілмейді. Мұндай талаптар жүлденің әділ өтуіне кепіл бола алады.

«Алтын қалам» байқау жұмыстарына жазушылар емес, оқырмандар баға беретін Қазақстандағы бірінші әдеби жүлде.