Алты алтын іздеуші карьерде ауа жетпей көз жұмды
НҰР-СҰЛТАН. ҚазАқпарат – Конго Демократиялық Республикасының шығысында орналасқан Джугу ауданында алтын өндірілетін карьерде жұмыс істеп жатқан алты алтын іздеуші оттегінің жетіспеуінен көз жұмды, деп хабарлайды ҚазАқпарат жергілікті Actualite порталына сілтеме жасап.
БАҚ-тан белгілі болғандай, заңсыз жұмыс істеген кеншілер дүйсенбі күні түнде «Ессіздік» атауымен белгілі карьерде қаза тапқан. Ол Джугу ауданына қарасты Мунгвалу ауылдық коммунадан жеті шақырымдай қашықтықта орналасқан.
«Бір құдықта жалпы 8 адам жұмыс істеп жатқан. Оттегінің жетіспеуінен осындай проблема туындаған. Екеуі көмек көрсетіліп, аман қалды, қалған алтауы оқиға орнында көз жұмды», - деді Мунгвалу ауылдық коммунасының басшысы Жан Пьер Бикилисенде.
Шахтаның полиция жасағы тергеу өткізу үшін оқиға орнына келді.
