«Алтын мінбер» мұсылман киносы фестивалінің бағдарламасы жасалды
АСТАНА. Тамыздың 13-і. ҚазАқпарат - Мұсылман киносының «Алтын мінбер» V халықаралық фестивалінің конкурс бағдарламасына 34 кинотуынды кіріп отыр. Қыркүйектің 30-ы мен қазанның 4-і аралығында Қазан қаласында өтетін фестиваль «Мәдениет диалогы арқылы - диалог мәдениетіне» деген ұранмен өтеді,
деп хабарлайды ресейлік «Жаңалықтар» агенттігі.
«Конкурстық бағдарламаға барлығы 34 туынды іріктелді: 12 толықметражды, 14 деректі, 8 қысқаметражды фильм. Ал конкурстан тыс бағдарламаға 22 кинотуынды таңдалды, олар «Татар киносының күні», «Кавказ киносының күні» және "Халықаралық панорама" арнайы кинобағдарламалары аясында көрсетіледі», - делінген фестиваль хабарламасында.
Алғашқы «Алтын мінбер» халықаралық фестивалі Қазанда 2005 жылдың қыркүйек айында өтіп еді. Фестивальдің құрылтайшылары - Ресейдің мүфтийлер кеңесі, Татарстанның Мәдениет министрлігі, Қазан қаласының мэриясы, Ресейдің Ислам мәдени орталығы және «Ислам әлемі» телерадиокомпаниясы.
