Амазонкада 185 жолаушы мінген кеме аударылды
АСТАНА. Шілденің 22-сі. ҚазАқпарат - Бортында шамамен 185 адам болған кеме сейсенбі күні Бразилияда Амазонка өзенінде апатқа ұшырады, деп хабарлайды «Вести-24» телеарнасы.
Манаус қаласынан Сантаремға бара жатқан "Каролина ду Норчи" кемесі жолға енді шыға салып, аударылған. Алдын-ала долбар бойынша, оқиғаға айлақтан шыға берісте штурвальдың істен шығуы себеп болған.
Жолаушылардың көбісі құтқарылған, бірақ олардың нақты саны әзірге анық емес. Кеме бортында экипаж мүшелерін қосқанда, қанша адамның болғаны әлі анық емес.
Қазір оқиға орнында сүңгушілер жұмыс істеуде. Көргендердің айтуынша, бірнеше адам өз каюталарынан шыға алмай қалған.
Амазонияда кеме апаттары жиі орын алады. Өткен жылдың мамыр айында "Команданте Салес" жолаушылар кемесі ұйыққа тап болып, аударылған кезде 40-тан астам адам қаза тапқан еді.
