«Ана мен бала» орталығында онкологиялық ауруды жеңген балалар арасында спорт жарыстары өтеді
НҰР-СҰЛТАН. ҚазАқпарат - Балаларды қорғау күніне орай Нұр-Сұлтан қаласында 1-2 маусым күндері «UMC» КҚ «Ана мен бала» ұлттық ғылыми орталығының онкология және бүйрек пен бауыр трансплантациясы бөлімшелерінің бұрынғы пациенттері арасында Чемпиондардың алғашқы республикалық ойындары - спорт жарыстары өтеді
Жарыстар жеңіл атлетика (жүгіру, 60 м), «Асық ату» ұлттық ойыны, үстел теннисі, ату (пневматикалық винтовка, 10 м), футбол (мини-футбол), шахмат (Швейцария жүйесі бойынша), боулинг секілді спорт түрлерінен өтеді.
Ойынға 3 жастан 16 жасқа дейінгі ауруды жеңген 106 бала қатысады. Аталған іс-шараның басты мақсаты - аурумен ұзақ уақыт бойы күресіп, оны жеңген балаларға өмірге қайта оралуға және аяғынан тұруға көмектесу.
Қазақстанда ойындарды өткізу бастамашысы - «Ана мен бала» ұлттық ғылыми орталығы. Орталыққа ҚР Денсаулық сақтау министрлігі Цифрландыру кеңсесінің қолдау көрсетіп отыр.
Сондай-ақ, іс-шараға қазақстандық эстрада жұлдыздары Маржан Арапбаева, Қазақстанның Х-фактор байқауының жеңімпазы Дильнура Біржанова, Ерлан Көкеев және спорт қайраткерлері - бокстан олимпиада чемпионы Серік Сәпиев және Қазақстандағы ЮНИСЕФ елшісі - шахматтан әлем чемпионы Динара Сәдуақасова қатысады. Жарыстар 1 және 2 маусым күндері сағат 09.00-де Қабанбай батыр даңғылы, 47 мекенжайы бойынша орналасқан «Алау» мұз айдыны алаңына өтеді.
