Ангелина Лукас әлем чемпионы атағы үшін жекпе-жекке шығады
АСТАНА. ҚазАқпарат – Аса жеңіл салмақтағы қазақстандық боксшы Ангелина Лукас келесі жекпе-жегінде тәжірибелі қарсыласпен кездесіп, әлем чемпионы атағы үшін таласады, деп хабарлайды ҚазАқпарат.
22 қазанда А.Лукас Ыстанбұлда (Түркия) өткен бокс кешінде украиналық Алена Гуриеваны жеңіп, UBO International титулын жеңіп алған болатын.
«Келесі жекпе-жекте рекорды жоғары қарсыласпен кездесемін. 22 қазанда титул үшін жұдырықтасқан украиналық қарсыласым өткен жылы Еуропа чемпионы Стефания Сильвамен кәсіпқой бокстағы сегіз күрделі раундтың бәрін өткізді. Стефания – өте тәжірибелі боксшы, соған сәйкес украиналық қарсыласым да мықты еді.
Келесі жекпе-жекте қарсыласымның рекорды тиісінше бұдан да жоғары болады және біз титул үшін күресеміз. Тағы бір титул, әлем чемпионы титулы», - деп жазды спортшы Instagram-дағы парақшасында.
Фото: sports.kz
