Анкара мен Ереван дипломатиялық қарым-қатынас орнатуға келісті
Бұл туралы Түркияның Сыртқы істер министрлігінің өкілі Бурак Озугергин мәлім етті, деп хабарлайды ҚазАқпарат Associated Press агенттігіне сілтеме жасап.
Оның айтуынша, алда қарым-қатынасты орнатудың нақты шарттары туралы келіссөздер ғана қалды. Келіссөздер алдағы 6 аптаның ішінде аяқталады деп күтілуде.
Естеріңізге сала кетейік, ағымдағы жылдың сәуір айында Түркияның Сыртқы істер министрлігі Армениямен арадағы екіжақты қатынасты ретке келтіру туралы келіссөздерде «ілгерілеушіліктің» бар екенін хабарлаған болатын. Екі мемлекеттің және осынау келіссөзде арағайын болып отырған Швейцарияның сыртқы істер министрлерінің бірлескен мәлімдемесінде атап көрсетілгендей, Анкара мен Ереван екіжақты қарым-қатынасты реттеудің кезең-кезеңдік жоспарын өзара келісті.
Түркия бірқатар шарт қойып отыр. Олар - 1915 жылғы армяндар геноцидін халықаралық қауымдастықтың тану саясатынан Арменияның бас тартуы және Қарабақ проблемасын реттеу шарттары. Ереван өз тарапынан, Түркиямен ешқандай алдын-ала шартсыз дипломатиялық қарым-қатынас орнатуға әзір екенін мәлім етуде.