Анна Данилина Варшава турнирінің финалына шықты

НҰР-СҰЛТАН. ҚазАқпарат – Қазақстанның жұптық сындағы бірінші, әлемнің 23-ракеткасы Анна Данилина Варшава WTA-250 турнирінің финалына шықты, деп хабарлайды ҚазАқпарат тілшісі.

Жарыстың 4-ракеткалары болып тіркелген А.Данилина мен германиялық Анна-Лена Фридзам жартылай финалда Польша өкілі Майя Хвалинска – чехиялық Джесика Малечковамен шеберлік байқасты.

Бірінші партия тағдыры тай-брейкте шешіліп, қазақстандық-германиялық жұп басымдылық танытты – 7:6 (7:3).

Екінші сетте Данилина мен Фридзам қарсыластарына бірде-бір гейм берген жоқ – 6:0. Олар сағат жарымға жуық уақытқа созылған кездесу барысында 9 брейк-пойнттың бесеуін пайдаланды.

Қазақстандық-германиялық дуэт финалда доданың 2-ракеткалары, польшалықтар Катажина Кава – Алисия Росольскамен бас жүлдені сарапқа салады.

Еске сала кетейік, бұдан бұрын Анна Данилинаның Варшава жарысының жартылай финалына өткенін жазған болатынбыз.

Фото: ktf.kz