«Аңсаған сәби»: Атырауда өмірге келген сәбидің салмағы – 503 грамм

Атырауда бес ай бұрын «Аңсаған сәби» бағдарламасымен өмірге келген сәби әлі ауруханада жатыр. Жақында перинаталдық орталықтан облыстық балалар ауруханасына ауыстырылды, деп хабарлайды ҚазАқпарат тілшісі

Ең жеңіл салмақтағы сәби отбасының тұңғышы екен. Өмірге келген кездегі салмағы – 503 грамм, ал, бойы 28 сантиметр болған.
«Мұндай жеңіл салмақтағы сәби шала туғандар санатына жатады. Облыстық перинаталдық орталықтың дәрігерлері бес айдан бері сәбиге қарқынды ем-дом жүргізді. Осы кезге дейін оның салмағы 2 келі 500 грамға жетті. Жақында одан әрі ем-дом шараларын жалғастыру үшін Атырау облыстық балалар ауруханасына ауыстырылды. Өйткені, оның өкпесі кішкентай болғандықтан, әлі де СРАР түтікшесіз аппаратымен оттегі беру қажет», - деп хабарлады перинаталдық орталықтың баспасөз қызметі.

Бұл сәбидің ата-анасы ЭКҰ әдісіне бес рет жүгінген. Ал, биыл «Аңсаған сәби» бағдарламасымен тағы да сәби сүюге бекінген.

«Отбасымыздың басты арманы – сәби сүю. Биыл жүктілік сәтті өтіп жатқан еді. Алайда, денсаулығыма байланысты жүктіліктің 22-аптасында егіз сәбиді босануға тура келді. Егіздің сыңары төрт сағаттан соң шетінеді. Енді осы қызымның амандығын тілеп отырмын», - дейді сәбидің анасы Анаргүл.

Еске сала кетелік, Атырауда былтыр «Аңсаған сәби» бағдарламасымен ЭКҰ-ға 233 квота бөлінгенін жазған едік.