Апатқа ұшыраған А-330 ұшағының «қара жәшіктерін» іздестіру шілденің 10-ына дейін жалғасады

ПАРИЖ.  Шілденің 3-і.  ҚазАқпарат -   Апатқа ұшыраған  А-330  ұшағының  «қара жәшіктерін» іздестіру   шілденің 10-ына дейін жалғасады. Бұл туралы  француздың  Зерттеу және талдау   бюросының   өкілі     маусымның 1-інде Атлантикада  орын  алған  қайғылы оқиға  туралы     алғашқы ресми  есепті таныстыру кезінде мәлім етті, 

 деп   хабарлайды ҚазАқпарат ИТАР-ТАСС агенттігіне  сілтеме  жасап.

Дейтұрғанмен,   А-330 аэробусы апатының  нақты себебі    осы күнге дейін  анықталған  жоқ.   «Эйр Франс»    компаниясының   Рио-де Жанейродан    Парижге   ұшып шыққан    ұшағы       беймәлім жағдайда Атлант мұхитының  үстінде апатқа ұшырағанын ҚазАқпарат бұдан бұрын хабарлаған болатын.    Ұшақ   бортында әлемнің 32  елінен  216 жолаушы және  экипаждың  12 мүшесі  болған.

Лайнердің  құлауына  жайсыз  ауа райының  себеп болу ықтималдығы  туралы гипотезаны  мамандар    теріске  шығарып  отыр.  «Ұшақтың жолында    экваториялық  аумақ үшін қалыпты  ауа райы  болған», делінген    Зерттеу және талдау   бюросының     есебінде.