Арал тұзына ерекше статус берілуі мүмкін

АСТАНА. KAZINFORM –Әділет министрлігінің ресми өкілі Талғат Уәли ведомствоның баспасөз мәслихатында өңірлерде географиялық нұсқама ретінде тіркеуге болатын өнімдер көп екенін айтты.

«Географиялық нұсқама дегеніміз белгілі бір географиялық аймақтан шыққан және сол орналасқан жеріне байланысты бірегей қасиеттерге немесе сапаға ие, ауылшаруашылық, азық-түлік, қолөнер мен өнеркәсіп өнімдерін анықтау үшін пайдаланылатын және табиғаты мен мәдениеті, тарихы мен шыққан жеріне тығыз байланысы бар жаңа зияткерлік меншік нысаны. Географиялық нұсқаманы тіркеу Қазақстанның әртүрлі аймақтарында өндірілетін тауарлардың ұлттық бренд ретінде дамуына, сондай-ақ олардың әлемдік нарықта танылуын, инвестициялық тартымдылығын арттыруға және туристік индустрияны дамытуға ықпал етеді», - дейді ол.

Талғат Уәли былтыр қыркүйекте Алматы апортына осындай статус берілгенін еске салды.

«Сол сияқты Қазақстанның әрбір өңірінде географиялық нұсқама ретінде тіркелу мүмкіндігі жоғары өнімдер бар. Мысалы, Қазақстандық тары, Қызылордалық «Арал тұзы», Шығыс Қазақстанның табиғи балы және басқа да өнімдер географиялық нұсқама тіркелуі мүмкін», - деді ресми өкіл.

Министрлік дерегіне сүйенсек, қазір елде 19 географиялық нұсқама ресми тіркелген. Тағы 109 өтініш қаралып жатыр.

Қазіргі уақытта тіркелген брендтер:

1. Алматы Апорты

2. Талғар алмұрты

3. Нарынқол картобы

4. Бақанас күріші

5. «Көкшетау» балмұздағы

6. «Көкшетау» майы

7. Бурабай балы

8. Қарағанды балмұздағы

9. Қарағанды бройлері

10. Қостанай балы

11. Түйе сүтінен жасалған «Арал» сабыны

12. «Арал» жантақ сабыны

13. Қызылорда тұзы

14. «Қазалы» кәмпиті

15. «Қазалы» сабыны

16. Сайрам Наны

17. TURKISTAN шоколады

18. TURKISTAN балмұздағы

19. ЧАЧА сусыны