Әрбір үшінші айыппұл жолда жылдамдықты асырғаны үшін салынған - Бас прокуратура
АСТАНА. KAZINFORM – ҚР Бас прокуратурасының Құқықтық статистика және арнайы есепке алу жөніндегі комитетінің мәліметінше, 2023 жылы 10,9 миллионнан астам әкімшілік айыппұл тіркелген.
«Мұның ішінде әкімшілік құқық бұзушылықтың 21 пайызын әйелдер жасаған. Есепті кезеңде өндірілген айыппұлдардың жалпы сомасы - 146 млрд теңге. Айыппұлдың көбі жол қозғалысы ережелерін сақтамау түріндегі құқық бұзушылықтарға қатысты тіркелген. Ал, әрбір үшінші айыппұл (барлық айыппұлдардың 39%-ы) жүргізушілердің белгіленген жылдамдықты асырғаны үшін (Әкімшілік кодекстің 592-бабы) салынған», — делінген мәліметте.
Сондай-ақ жол белгілеріне бағынбау немесе жолда белгіленген талаптарды сақтамау жиі кездеседі (Әкімшілік кодекстің 601-бабы). Соңғы бір жылда мұндай құқық бұзушылықтар 1,9 миллионнан астам рет (18%) тіркелген.
Айта кетейік, бұған дейін Петропавлда жол ережесін бұзған 200 астам жаяу жүргінші жауапқа тартылғанын жазғанбыз.
Биыл Павлодар облысындағы автобус жүргізушілері жол ережесін 300 мәрте бұзған.
