Арыста әскери қызметші травматикалық қарудан жарақат алды
ТҮРКІСТАН. KAZINFORM – Арыс гарнизоны әскери бөлімдерінің бірінде келісімшарт бойынша қызмет атқаратын әскери қызметші травматикалық қарудан басынан жарақат алды.
Оқиға 16 қыркүйек күні тәуліктік кезекшілікті атқару кезінде болды. Шымкент гарнизонының баспасөз қызметі ұсынған ақпаратқа сүйенсек, келісімшарт бойынша әскери қызметші отбасылық-тұрмыстық жанжал аясында өз-өзіне қол жұмсамақ болған.
«Жарақат алу фактісі бойынша қылмыстық іс қозғалып, тергеу іс-шаралары жүргізілуде. Келісімшарт бойынша әскери қызметші аудандық ауруханаға жеткізілді. Оған барлық қажетті медициналық көмек көрсетіліп жатыр. Қазіргі уақытта денсаулық жағдайы тұрақты-ауыр деп бағаланып отыр. Өміріне қауіп төніп тұрған жоқ», - делінген ақпаратта.
Еске сала кетейік, бұған дейін бірнеше айдан бері комада жатқан сарбаз Ербаян Мұхтардың қазіргі денсаулық жағдайы шетелге апаруға жарамайтынын жазған болатынбыз.
