Арқалықтың құтқарушылары батпаққа батқан 7 өзбекстандықты алып шықты
ҚОСТАНАЙ. ҚазАқпарат - Құтқарушылар Арқалық қаласының жанында батпақта тұрып қалған өзбекстандықтар мінген көлікті шығарды, деп хабарлайды ҚазАқпарат ҚР ІІМ ТЖК баспасөз қызметіне сілтеме жасап.
Оқиға Арқалық қаласынан 80 шақырым жерде болған. Жезқазған қаласына бағыт алған «Mercedes-Benz Vito» көлігі батпақта тұрып қалған.
«2018 жылдың 7 қарашасы күні сағат 17.00-де Арқалық қаласы Солтүстік өңірлік аэромобильді ұтқыр жасағына Терісаққан өзенінің жанындағы жолда автокөлігінің тұрып қалғаны туралы хабар келіп түсті. Көліктің нөмірі Қырғыз мемлекетіне тиесілі екені анықталды», - делінген ҚР ІІМ ТЖК баспасөз хабарламасында.
Көлікте 7өзбек азаматы болған. Олардың 3-еуі - бала. Сондай-ақ, олар нақты мекенжайларын айта алмаған.
Арқалық құтқарушылары көлікті іздеуге 5 сағат 50 минут жұмсады. «Mercedes-Benz Vito» Терісаққан өзенінің маңындағы өткелден табылды. Көлік батпаққа батып бара жатқан жерден шығарылды.
Жолаушылар Арқалық қаласына жеткізілді, медициналық көмекке жүгінген жоқ. Өз кезегінде олар құтқарушыларға алғыстарын білдірді.
