Арнаулы кәсіптік мемлекеттік жәрдемақы: еліміздің қай өңірінен көп өтініш түсті
АСТАНА. KAZINFORM – Қаңтар айында ХҚКО-лар арнаулы кәсіптік мемлекеттік жәрдемақы алуға 1200-ден астам өтініш қабылдады. Қауіпті өндірістердегі жұмысшыларды қолдауға арналған бұл тетік Қазақстанда алғаш рет 2024 жылы енгізілген. Бір айдың қорытындысы бойынша республикалық бюджеттен өтінім бергендерге 160 млн астам теңге төленді.
«Азаматтарға арналған үкімет» мемлекеттік корпорациясы КЕАҚ-тың баспасөз қызметінен мәлім еткеніндей, қазақстандықтардың басым бөлігі жәрдемақы алуға Қарағанды, Қостанай, Шығыс Қазақстан және Ақмола облыстарынан жүгінген. Батыс Қазақстан облысы бойынша 25-тен астам өтініш қабылдады.
«Арнаулы әлеуметтік жәрдемақы ең төменгі күнкөріс деңгейінің екі есе мөлшеріндегі арнаулы кәсіптік мемлекеттік жәрдемақыдан, сақтандыру ұйымдарының төлемдерінен, жұмыс берушілердің төлемдерінен, міндетті кәсіптік зейнетақы жарналары есебінен және Бірыңғай зейнетақы қорынан төленетін төлемдерден тұрады. Жәрдемақы 55 жастан асқан адамдарға беріледі және зейнеткерлік жасқа дейін жалғасады. Аталмыш жәрдемақыны тағайындау үшін қызметкер БЖЗҚ-да 7 жылдан кем емес мерзімде міндетті кәсіптік зейнетақы жарналарын жинақтаған болуы керек және ол зиянды жағдайларда жұмысын тоқтатқан, жұмыстан шыққан немесе жеңіл жұмысқа ауысқан болуы шарт. Арнаулы кәсіптік мемлекеттік жәрдемақы тағайындауға өтінішті ХҚКО-дан тапсыруға болады. Сондай-ақ, қазақстандықтарға жәрдемақы проактивті форматта да тағайындалады, егер телефонға 1414 нөмірінен тиісті ұсыныс түссе, хабарламаға келісімдерін берулері керек», - деп хабарлады ведомстводан.
