Арнайы операцияларға Қазақстан әскерін қатыстыру мәселесі қаралды
АЛМАТЫ. ҚазАқпарат - Алматыда өткен халықаралық ғылыми-теориялық конференцияда қазіргі әскери шиеленістер тәжірибесі бойынша арнайы операцияларға әскер түрлерін жұмылдыру мәселелері талқыланды. Бұл туралы ҚазАқпарат ҚР Қорғаныс министрлігінің баспасөз қызметіне сілтеме жасап хабарлайды.
Радиоэлектроника және байланыс әскери-инженерлік институтында өткен конференцияның мақсаты - қазіргі уақытта болып жатқан және өткен әскери шиеленістер мен жергілікті соғыстар аясындағы қауіптер мен сын-қатерлерді талқылау.
Конференцияға Қазақстан, Қырғызстан, Ресей жоғары әскери оқу орындарынан, ҚР Тұңғыш Президенті - Елбасы атындағы Ұлттық қорғаныс университетінен, Құрлық әскерлері әскери институтынан, ҚР Ұлттық қауіпсіздік комитеті академиясынан, ҚР Ішкі істер министрлігі Алматы академиясы мен әл-Фараби атындағы Қазақ ұлттық университетінен 130-дан астам өкіл, сондай-ақ әскери саладағы жетекші ғалымдар мен сарапшылар қатысты.
Радиоэлектроника және байланыс әскери-инженерлік институтының басшысы, полковник А.Мұстабеков конференцияға қатысушылар алдында сөйлеген сөзінде қазіргі кездегі жергілікті соғыстар мен әскери қақтығыстардың себептерін негіздеуде Қазақстан Республикасы әскери ғалымдарының рөлін, сондай-ақ оларды дамытуға қарсы тұрудың теориясы мен тәжірибесін жасаудың маңыздылығын атап өтті.
