Арықтан 25 миллион доллардың асыл заттары табылды
АСТАНА. 9 наурыз. ҚазАқпарат - Француз полицейлері 2008 жылдың соңында Harry Winston бутигінен ұрланған зергерлік бұйымдар мен асыл заттардың бір бөлігін Париж іргесіндегі үйлердің бірінің сарқынды су ағатын құбырынан тауып отыр.
Табылған асыл заттар шамамен 18 миллион еуроға (25 миллион доллар) бағаланып отыр, деп хабарлайды Utro.ru сайты.
Құқық қорғау органы өкілінің айтуынша, асыл заттар Париждің іргесіндегі Сен-Сен Дениде бір үйдің іргесіндегі сарқынды су ағатын арықтың ішіне жасырылған болып шықты. Ол үй -атышулы ұрлыққа қатысы бар деп айыпталған тоғыз адамның бірінікі.
2008 жылдың желтоқсан айында белгісіз бір топ адам қару-жарақпен қорқытып, Елисей алқабындағы Harry Winston бутигінен 85 миллион еуроның (118 миллион доллар) зерлерлік бұйымдарын ұрлап кеткен еді. Бұл қылмыс Франция тарихындағы ең ірі ұрлық саналады.
