Арыс маңында жарылыс болып, 10 сапер зардап шекті

АРЫС. ҚазАқпарат - Арыс қаласынан 60 шақырым жерде, арнайы жасақталған полигон аумағында оқ-дәрі бөлшегі жарылды. Бұл туралы ҚазАқпарат тілшісі ҚР Қорғаныс министрлігіне сілтеме жасап хабарлайды.

«21 қыркүйек күні арнайы жасақталған полигон (Арыс қаласынан 60 шақырым жерде) аумағындағы жоспарлы жарылыс жасау жұмыстары барысында оқ-дәрі фрагменті өздігінен жарылды. Соның салдарынан арнайы дайындықтан өткен 10 сапер - келісімшарт әскери қызметшісі жарқыншақ тиіп жарақат алды», - делінген министрлік ақпаратында.

Ведомство мәліметінше, барлық әскери қызметшілер ҚР Қорғаныс министрлігінің далалық госпиталіне жатқызылған. Қажетті медициналық көмек толық көлемде көрсетіліп жатыр. Болған оқиғаның себебі мен мән-жайын анықтау шаралары жүргізілуде.