Арзан несие шаруаларды субсидия рәсімдеу ауыртпалығынан арылтты – Агрофорум

АСТАНА. KAZINFORM – Ауыл шаруашылығы министрі Айдарбек Сапаров ауыл шаруашылығы қызметкерлерінің бірінші форумында агроөнеркәсіп кешеніндегі несие саясатының қай бағытта өзгеріп жатқанын айтты.

«Жылдар бойы салада жаңа технологияларды кеңінен енгізуге жеңілдетілген қаржыландыру тетіктерінің аздығы кедергі болды. Арзан несие қаражатының тапшылығы ауыл шаруашылығы өнімдерінің қымбаттауына алып келді. Шектеулі бюджеттік қаржыландыру әрқашан фермерлердің аяғына тұсау болып келді. Құрметті Қасым-Жомарт Кемелұлы, биыл сіздің тапсырмаңыз бойынша саланы қаржыландыру тәсілдері толығымен қайта қаралды. Коммерциялық және бюджет қаражатын біріктіру есебінен егіс жұмыстарын қаржыландыру көлемі 3 еседен астам ұлғайтылды», - деді ведомство басшысы. 

Сондай-ақ, ол Үкіметтің қолдауымен несиелеу арналарын кеңейтуге жол ашылғанын айтты.

«Кепілге қоятын активі жоқ шаруаларға мемлекет есебінен қарыз сомасының 85%-ына дейін кепілдік енгізілді. Боры қаражатың бәрі 5%-ды таза мөлшерлемемен беріліп жатқанын атап өту керек. Осылайша біз агробизнес субсидияларына өтінім берудің ауыртпалығын жойдық. Өйткені арзандатылған несиеге жол ашылып отыр. Осының арқасында жеңілдетілген қарыз қаражатының 89%-ы шағын және орта агробизнес бағытталды», - деді Айдарбек Сапаров.

Еске сала кетейік, Астанада ауыл шаруашылығы саласы қызметкерлерінің форумы өтіп жатыр.