Аса ірі мөлшерде алаяқтық жасаған күдікті Ресейден экстрадицияланды

Прокуратура
Фото: Маскат Шагырбаев / Kazinform

АСТАНА. KAZINFORM – Бүгін Бас прокуратура Қазақстан Республикасының Ішкі істер министрлігімен бірлесіп, аса ірі мөлшерде алаяқтық жасағаны үшін қылмыстық жауапкершілікке тарту мақсатында Ресей Федерациясынан күдіктіні экстрадициялады.  Бұл туралы Бас прокуратураның баспасөз қызметі мәлімдеді.

«Ол 2020-2023 жылдар аралығында құрылыс компаниясының басшысы бола отырып, Астана қаласында премиум санатындағы пәтерлерді салу және сату сылтауымен алдын ала сөз байласу арқылы адамдар тобында 4,3 млрд теңгеден астам сомаға 200-ден астам үлескердің ақшалай қаражатын ұрлап кеткен», — делінген хабарламада.

Қылмыс жасағаннан кейін күдікті жасырынып, осыған байланысты халықаралық iздестiру жарияланған. 

«Өткен жылдың қараша айында Қазақстан Республикасы Бас прокуратурасының сұрау салуы бойынша бұл тұлға Ресей Федерациясының аумағында ұсталып, оны экстрадициялау туралы шешім қабылданды. Қазіргі уақытта ол тергеу изоляторына қамалды», — деп хабарлады Бас прокуратурадан.

Қылмыстық топтың басқа сыбайлас қатысушылары өткен жылдың соңында ұсталып, қазірді таңда оларға қатысты тергеу амалдары жүргізіліп жатыр.

Аталған қылмыс жасағаны үшін мүлкі тәркіленіп, 5 жылдан 10 жылға дейінгі мерзімге бас бостандығынан айыру жазасы қарастырылған.

Соңғы жаңалықтар