Әсел Далиева тоғызқұмалақтан 9 дүркін әлем чемпионы атанды
Бұл туралы ҚазАқпарат тілшісіне тоғызқұмалақтан Қазақстан ұлттық құрамасының бас жаттықтырушысы Айнұр Жақапбаева айтып берді.
«Бүгін Тоғызқұмалақтан V әлем чемпионаты өз мәресіне жетті. Үкілеп алып барған қыз-жігіттеріміз үмітті ақтады. Осы біріншілік аясында қыздар арасында Әсел Далиева 9 дүркін әлем чемпионы атағына қол жеткізсе, ерлер арасында Ғалымжан Темірбаев 4 дүркін әлем чемпионы атанды. Жарыстың соңғы күні рапид түрінен жеңімпаздар анықталды. Жеңімпаздар мен жүлдегерлерді Дүниежүзілік тоғызқұмалақ және мангала федерациясының президенті Рауф Өзген марапаттады», - деп атап өтті Айнұр Жақапбаева.
Бас жаттықтырушының Түркиядан арнайы берген мәліметінде рапидтан ерлер арасындағы және әйелдер арасындағы додада жүлденің барлығы Қазақстан ойыншыларына бұйырған.
Атап айтар болсақ, рапидтен бас жүлдені Ғалымжан Темірбаев жеңіп алса, екінші орынға Биғали Зікрияев ие болды. Ал үздік үштікті Бексұлтан Бостандықов пен Аманбек Өндірбаев қанжығаларына байлады.
Қыздар арасындағы сайыста әлем чемпионы атағын Лина Каримова жеңіп алса, екінші орынға Əсел Дәлиева ие болды. Үздік үшінші орындарды Гүлнар Базаралиева мен Ализа Ерниязова жеңіп алды.
Естеріңізге сала кетейік, осыған дейін тоғызқұмалақтың классика және блиц түрінен жеңімпаздар мен жүлдегерлер атанған ойыншылар туралы жазған болатынбыз.
