Асхат Жұмағали Transparency International жайлы: 39 балл — тарихтағы үздік позиция
АСТАНА. KAZINFORM — Сыбайлас жемқорлыққа қарсы іс-қимыл агенттігінің төрағасы Асхат Жұмағали Jibek Joly телеарнасының «Уәде» бағдарламасына берген эксклюзивті сұхбатында Антикор қызметінің басты өлшемшарттарын атады.
Transparency International жемқорлықты қабылдау индексіне сәйкес, Қазақстан 2023 жылы 100 баллдың 39-ын жинап, дәрежесін 8 позицияға жақсартты және 101-орыннан 93-орынға көтерілді. Ал өткен жылға арналған ақпаратқа қарағанда, еліміз 88-орынға тұрақтады. Яғни, Қазақстан Орталық Азия өңірінің елдері арасында ең жоғары орында тұр.
— Әрине, халықаралық рейтингтер бойынша белгілі бір оң ілгерілеушілік біздің дұрыс бағытта қозғалып келе жатқанымызды білдіреді деп есептеймін. Жемқорлықты қабылдау индексі бойынша еліміз жинаған 39 балл — бұл тарихтағы ең үздік позиция, — деп атап өтеді Антикор басшысы.
Сонымен қатар, ол ведомство жұмысының негізгі бағыттарын да белгілеп өтті. Айта кетерлігі, өткен жылы еліміздің Антикор органы 1 641 жемқорлық қылмысын анықтап, 1 493 адамды әшкереледі. Оның ішінде 914 адамға қазірдің өзінде сот үкімі шығарылды.
— Қызметіміздің ең басты өлшемшарты — бұл сыртқы пішіні бойынша тек көрсеткіштер, яғни халықаралық агенттіктер түзетін рейтингтер ғана емес, қоғамдағы жемқорлықты жою және азаматтардың әл-ауқатын жақсарту, — деді Антикор басшысы.
Асхат Жұмағали атап өткендей, халықаралық рейтингтердегі оң динамика — бұл дұрыс бағдар көрсеткіші. Бірақ, ең бастысы — азаматтардың өмірін шынайы өзгерту.
Бұған дейін Антикор басшысы еліміздегі цифрлық «боялған» ақша жобасының алғашқы нәтижесі жайлы айтып бергенін жазған едік.
Сонымен қатар, ол мемлекеттік қызметшілер тексеруші органдардан қорқатындықтан шешім қабылдау барысында жиі қауіптенетінін айтты.
