АШМ майлы дақылдар егістігінің алқабын 2,5 млн. гектарға жеткізуді жоспарлап отыр

АСТАНА. 28 желтоқсан. ҚазАқпарат /Руслан Ғаббасов/ - Майлы дақылдар егістігінің алқабын 2,5 млн. гектарға жеткізу жоспарланып отыр. Бұл туралы бүгін биылғы 11 айдың қорытындысына арналған Үкімет отырысында Ауыл шаруашылығы министрі Асылжан Мамытбеков мәлім етті.

«Майлы дақылдар өндірісінің көлемін арттыру үшін тауар өндірушілердің қызығушылығын арттыру мақсатында субсидиялаудың жоғары нормативтері белгіленді. Аталған шара саланың тиімділігін арттыруға мүмкіндік берді», - деді министр. Оның сөзіне қарағанда, 3 жылдың ішінде олардың егіс алқабтары 905 мыңнан 1,8 млн. гектарға артты. «Алдағы уақытта да аталған дақылдардың егіс алқабын 2-2,5 млн. гектарға жеткізіп, кеңейту шаралары жоспарлануда. Бүгінде мемлекеттік қолдаудың деңгейі сақталған жағдайда біз майлы дақылдар бойынша алдағы екі жылда өзімізді қамтамасыз ету дәрежесіне жетеміз», - деп атап өтті А. Мамытбеков.