Асқар Жұмаділдаев, Ақылбек Күрішбаев, Серік Ақшолақов — ҰҒА құрамына жаңадан 9 ғалым енді
АЛМАТЫ. KAZINFORM – ҚР Президенті жанындағы Ұлттық ғылым академиясының құрамына жаңадан тоғыз ғалым енді.
Академияның жаңа мүшелерін сайлау ҚР Ғылым және жоғары білім министрлігі бекіткен қағидаларға сәйкес, елдің ғылыми ұйымдары мен жоғары оқу орындары ұсынған үміткерлер арасынан сайланды.
Қазақстан Республикасы Президентінің жанындағы Ұлттық ғылым академиясының басшысы Ақылбек Күрішбаевтың сөзінше, ең алдымен, қолданыстағы заңның аясында ҚР Үкіметінің шешіміне сәйкес құрылған өтпелі төралқа үш академикті сайлады.
«Бұдан әрі, Қазақстан Республикасы Ғылым және жоғары білім министрлігі бекіткен академиктерді сайлау қағидаларына сәйкес, елдің ғылыми ұйымдары мен жоғары оқу орындары ұсынған үміткерлер арасынан үш кезеңдік сайлау өткізілді. Алдымен ұсынылған құжаттардың толықтығы және үміткерлердің белгіленген критерийлер мен талаптарға сәйкестігі тексерілді. Кейін сараптама комиссиясы әрбір үміткердің сапалық және сандық көрсеткіштері бойынша қорытынды жасады. Үшінші кезеңде Ғылым академиясының Төралқасы әрбір үміткердің бағдарламасының өзектілігін, жаңашылдық деңгейін, тиімділігін, нысаналы көрсеткіштерге қол жеткізуі мен оның ресурстық қамтамасыз етілуін тыңдады», – деп түсіндірді Ақылбек Күрішбаев.
Нәтижесінде ҰҒА құрамына ғылымда ерекше жетістіктері бар тоғыз ғалым енді.
Академик атанған 9 адамның ішінде белгілі математик Асқар Жұмаділдаев, қазақ нейрохирургтары ассоциациясының президенті Серік Ақшолақов, «PERSONA» халықаралық клиникалық репродуктология орталығының жетекшісі Вячеслав Локшин, «Назарбаев Университеті» ДББҰ қауымдастырылған профессоры Сұраған Дөрбетхан, Энергетика министрлігінің «Ядролық физика институты» Астана филиалының директоры Максим Здоровец, әл-Фараби атындағы қазақ ұлттық университетінің профессоры Тілекқабыл Рамазанов, «Өсімдіктер биологиясы және биотехнологиясы институты» ШЖҚ РМК молекулалық генетика зертханасының меңгерушісі Ерлан Тұрыспеков, «Назарбаев Университеті» ДББҰ Вице-президенті Дархан Біләлов, Қазақстан Республикасы Президентінің жанындағы Қазақстан Республикасы Ұлттық ғылым академиясының басшысы Ақылбек Күрішбаев бар.
Ұлттық ғылым академиясының академиктерін сайлаудың келесі кезеңі алдағы айларда өтеді.
«Сараптама нәтижелері бойынша ең көп балл жинаған, бағдарламаны қорғау нәтижелері бойынша ең жоғары бағалау көрсеткішіне ие болған және академиктердің Жалпы жиналысына қатысушылардың жасырын дауыс беруі арқылы жалпы санының кемінде үштен екісі дауыс берген үміткерлер ғана академиктер болып сайланды», – деді Ақылбек Күрішбаев.
